Arrestohet Ardian Alaj, njëri prej të dyshuarve për sulm kibernetik ndaj Insajderit

Në Prishtinë është arrestuar Ardian Alaj, i dyshuar për rastin e “Insajderit”. Alaj është arrestuar si i dyshuar për tri vepra penale: ndërhyrje në sisteme kompjuterike, keqpërdorim të besimit dhe vetëgjyqësi.

Gazeta Express merr vesh se rasti ka të bëjë me marrjen nën kontroll në mënyrë të paligjshme të gazetës online Insajderi, pronë e “Insider LLC”, kompani në pronësi të Parim Ollurit dhe Vehbi Kajtazit.

Përveç kësaj, të dyshuarit kanë arritur që përkohësisht ta marrin nën kontroll edhe faqen e Facebookut të Insajderit, duke prezantuar dokumente të rrejshme.

Ata, kanë ndryshuar emrin e një firme “Shqip SHPK” të regjistruar në 2009, në “Insajderi SHPK”, për ta vënë në lajthitje :”Facebookun” dhe organet e hetuesisë.

“SHQip SHPK”, është regjistruar në Agjencinë për Regjistrim të Bizneseve me 2 qershor 2009, derisa emri në “Insajderi SHPK”, i është ndërruar 8 maj 2020. Me këto dokumente kanë vënë në lajthim Policinë dhe “Facebookun”, për ta marrë faqen e “Insajderit”.

Ndërkohë, të dyshuarit pas marrjes nën kontroll të “Insajderi.com”, kanë vazhduar me sulme kundër pronarëve Vehbi Kajtazi dhe Parim Olluri, se gjoja ata janë shkarkuar nga detyrat për shkak të keqpërdorimeve.

Të dyshuarit janë të njohur për sulme kundër medieve. Florim Alaj, është i akuzuar për sulm kibernetik kundër mediumit, “Infokusi”.

Po, ashtu janë të dyshuar për sulm dhe shkatërrim të kanalit të “Youtube”, të RTK-së.

Pronari i “Infokusit”, Shkelzen Dakaj, ka rrëfyer ditë më parë në një postim në “Facebook”, se si ia shkatërruan biznesin, Florim e Ardian Alaj. Sipas aktakuzës, Alaj e ka dëmtuar Dakajn në vlerë prej 100 mijë eurosh.