Grenell thotë se pala kosovare do të përfaqësohet në takimin e Washingtonit nga kryeministri Hoti

Presidenti i Republikës së Kosovës, Hashim Thaçi, ka anuluar udhëtimin e tij drejt Washingtonit, pas njoftimit zyrtar për dorëzimin e aktakuzës nga Specialja ndaj tij dhe Kadri Veselit.

Lajmin e ka konfirmuar emisari i Trump, Richard Grenell, por edhe vetë zyra e Thaçit në Prishtinë, shkruan express

Megjithatë takimi i 27 qershorit nuk do të anulohet. Siç ka shkruar Richard Grenell, takimi në Washington do të realizohet dhe Republika e Kosovës do të përfaqësohet nga kryeministri i Kosovës, Avdullah Hoti.

“Presidenti i Kosovës sapo më informoi që ai ka anuluar udhëtimin e tij drejt Washingtonit, pas aktakuzës që u bë publike nga Zyra e Prokurorit Special. Respektoj vendimin e tij për të mos marrë pjesë në takim derisa çështjet ligjore të atyre pretendimeve të zgjidhen”, ka shkruar Grenell.

Ai tutje ka thënë se takimi i të shtunës nuk do të anulohet, dhe se presidenti Vucic do të jetë në takim bashkë me kryeministrin e Kosovës, Avdullah Hoti.

“Ne shikojmë përpara drejt diskutimeve të së shtunës që do të drejtohen nga presidenti Vucic dhe kryeministri Hoti”, ka shkruar Grenell.