Mbyllet Drejtoria e Buxhetit në Gjilan, disa zyrtarë rezultojnë pozitivë me COVID-19

Pas rezultimit me COVID-19 të disa zyrtarëve, është mbyllur deri në një vendim tjetër Drejtoria e Buxhetit në Gjilan.

Komiteti i Emergjencave në Gjilan, në mbledhjen e radhës të mbajtur sot, ka vlerësuar gjendjen dhe ka rekomanduar respektimin e masave mbrojtëse, në mënyrë që rastet të jenë gjithnjë në rënie, njofton kumtesa komunale, transmeton Mediafokus.info.

Selami Xhemajli, drejtor i Shëndetësisë dhe Mirëqenies Sociale, ka thënë se nga rezultatet e fundit, janë konfirmuar 17 raste pozitive me Covid-19.

“Nga numri i përgjithshëm i rasteve prej 605 sa janë në totalin e përballjes me gjithë pandeminë, të shëruar janë 403 raste, të vdekur fatëkeqësisht janë 25 raste dhe në 177 raste janë aktive. Përkujdesja institucionale është në baza ditore me asistencë shëndetësore dhe me medikamente. Kemi, gjithashtu, edhe 91 mostra që janë në përpunim dhe rezultatet e tyre do të publikohen në ditët në vijim. Në Spitalin Regjional janë duke u trajtuar 31 pacientë të konfirmuar me Covid-19”, ka njoftuar Xhemajli, në konferencën për media.

“Më tej, ai ka konfirmuar se për shkak të rezultimit me Covid-19 të disa zyrtarëve në Drejtorinë e Financave, është mbyllur ky shërbim deri në një vendim tjetër, sepse zyrtarët e këtij resori janë në vetizolim”, thuhet ne njoftimin e Komunes se Gjilanit.

Komiteti ka apeluar që personat e konfirmuar me Covid-19 dhe ata që kanë pasur kontakt me të infektuarit, të qëndrojnë në vetizolim në afatin e rekomanduar nga institucionet shëndetësore, po ashtu sektori privat dhe gastronomia në përgjithësi të respektojë vendimet e shtetit për respektim të distancës dhe ofrimin e shërbimit me masat mbrojtëse.