Nga sot trajtimi i pacientëve me COVID-19 bëhet vetëm në Klinikën Infektive dhe atë të Pulmologjisë

Ushtruesi i detyrës së drejtorit të përgjithshëm të ShSKUK-së, Valbon Krasniqi, ka bërë të ditur se nga sot do fillojë të lirohet Klinika e Neurologjisë, në mënyrë që pacientët me COVID-19 të trajtohen vetëm në Klinikën Infektive dhe atë të Pulmologjisë.

Krasniqi në një konferencë për media tha se qëllimi është të lirohen klinikat e tjera në të cilat aktualisht po trajtohen pacientë me COVID-19, raporton Telegrafi.

“Gjendja e pacientëve vazhdon të mbetet e rënduar. Ende kemi pacientë në gjendje të rëndë dhe në numër të madh. Kemi vendosur që sot gradualisht të lirojmë Klinikën e Neurologjisë, nga data 21 në repartin e operativës së gjinekologjisë nuk ka pacientë me COVID. Sot pacientët që janë në repartin e neurologjisë do t’i bartim në Klinikën e Pulmologjisë dhe Infektologjisë, që të provojmë t’i kemi pacientët vetëm në këto dy klinika dhe t’i kthejmë shërbimet për pacientët e tjerë”, ka thënë Krasniqi.

Krasniqi deklaroi se aktualisht janë mbi 40 pacientë në respiratorë.

“Edhe pse javët e fundit vërehet një trend i lehtë i numrave që kërkojnë trajtim në spitale, ende kemi numër të rënduar. Ende kemi mbi 40 pacientë në respiratorë. Është mundësia e fundit e pacientëve për t’u ndihmuar dhe stafi po bëjnë të pamundurën tu vijnë në ndihmë”, pohoi ai.

Krasniqi ka thënë se qytetarët duhet të bartin maska, të mbajnë higjienën edhe distancën fizike.