Njoftim i rëndësishëm për ata që nuk i kanë marrë ende 130 euro nga Pakoja Emergjente

Ministri i Punës dhe Mirëqenies Sociale, Skënder Reçica, përmes një postimi në Facebook ka dhënë një njoftim të rëndësishëm lidhur me asistencën mujore prej 130 euro, sipas masës nr. 15 të Pakos Emergjente Fiskale.

Sipas njoftimit të ministrit Reçica, të gjitha familjet që kanë aplikuar për asistencë mujore në vlerë prej 130 euro dhe që ende nuk i kanë marrë ato, mund të ankohen në të gjitha Qendrat për Punë Sociale pranë Komunave të Republikës së Kosovës.

“Ministria e Punës dhe Mirëqenies Sociale ( MPMS) njofton të gjithë familjet dhe qytetarët, se nga sot me datë 17 gusht 2020, në të gjitha Qendrat për Punë Sociale pranë Komunave të Republikës së Kosovës, ka filluar procesi njoftues dhe ankimor lidhur me vendimin për asistencën mujore, sipas Masës Nr.15 të Pakos Emergjente Fiskale”

“Të gjitha familjet të cilët kanë aplikuar për asistencë mujore në vlerë prej 130.00 euro, sipas Masës Nr.15 të Pakos Emergjente Fiskale dhe të cilat deri më tani nuk kanë pranuar njoftim zyrtar përmes mesazheve telefonike apo kontaktimit të drejtpërdrejtë nga institucionet e nivelit qendror apo lokal, mund të paraqiten në Qendrat për Punë Sociale, të Komunës përkatëse, deri më 31 gusht 2020, për të pranuar vendimin zyrtar dhe për të shfrytëzuar mundësinë e parashtrimit të ankesës, kundër këtij vendimi”, ka shkruar Reçica.