Pacollët flasin ndryshe-ndryshe për taksën, Baci e ka më mirë
Behgjet Pacolli e Selim Pacolli vijnë nga e njëjta familje biologjike dhe politike, por ata kanë mendime të ndryshme sa i përket aplikimit të një takse për hyrje me vetura në Prishtinë.
Nënkryetari i Prishtinës, Selim Pacolli, ka thënë se askujt nuk i mohohet e drejta për të hyrë me veturë në Prishtinë, por për ta shfrytëzuar këtë të drejtë, duhet të paguhet taksa e gjelbër.
Ndërkaq, Behgjet Pacolli e ka qujatur shaka të sezonit paralajmërimin për taksë.
Sipas Selimit, një taksë prej 10 euro, do të mundësonte krijimin e një ambienti më të pastër, kur dihet se gjatë dimrit Prishtina renditet në mesin e vendeve më të ndotura në botë dhe njëri nga këta ndotës, janë edhe veturat.
“Çdo kush që vjen nga Peja, Gjakova, Klina, Drenica, ka të drejtë dhe mund të hyjë në Prishtinë, vetëm se për këtë duhet ta paguajë taksën e gjelbër, duhet të paguajë 10 euro”, ka thënë Selim Pacolli.
Baci (Behgjet Pacolli) ka thënë se është e padrejtë ndaj qytetarëve vetëm të mendohet një gjë e tillë, ndërkohë që ka ofruar një zgjidhje tjetër për këtë problem, që sipas tij, do të ishte një “qytet administrativ” në Hajvali.
Postimi i tij i plotë në Facebook:
Në propozimin e Komunës së Prishtinës për hyrjen me pagesë, deri më tani kam heshtur duke menduar se është një shaka e sezonit.
Është e padrejtë ndaj qytetarëve, vetëm të mendojnë për një gjë të tillë. Komunat nuk mund të prekin gjithmonë xhepat e qytetarëve për të justifikuar “punën” e tyre ose më saktë “përshtatshmërinë e tyre të modus operandit”. Ju Komunarët nuk guxoni ta bëni atë.
Zgjidhja e problemit të trafikut në qytet ishte propozimi im i hershëm….bartjen e administratës dhe zyrave të tjera civile dhe të biznesit nga qyteti në periferi, së bashku me kampuset universitare në mënyrë që qyteti aktual t’u lihet banorëve. Kjo ka qenë, mbetet dhe do të jetë zgjidhja e vetme.
E them nga viti 2006. Kur isha në qeveri u përpoqa më gjithë qenien për ta bërë të mundur këtë (edhe duke financuar një pjesë të madhe nga logjistika ime) por isha i vetmuar në këtë ide dhe kjo u banalizua nga kolegët e mi në qeveri. Për këtë, unë kisha prezantuar një projekt i cili madje ishte “humbur” në mjediset e Kryeministrisë.
Nëse ata do të më kishin dëgjuar mua, sot do të kishim pjesën më të madhe të “Qytetit Administrativ” në Hajvali dhe ajo hapësirë nuk do të ishte shkatërruar siç po ndodh tani, ka shkruar Behgjet Pacolli.