Rekomandim për strategji të re, sot në Gjilan nuk u lejua marrja e mostrave për testim

Instituti Kombëtar i Shëndetësisë Publike dhe Ministria e Shëndetësisë, të dielën mbrëma kanë nxjerrë një rekomandim përmes së cilit kanë njoftuar për një strategji të re të testimeve për COVID-19. Ky rekomandim është dërguar në qendrat rajonale të shëndetit publik.

Por, si duket ka hasur në keqkuptim. Kjo pasi në komunën e Gjilanit, sot nuk është lejuar marrja e mostrave për testim, shkruan Gazeta Express

Nënkryetari i Komunës së Gjilanit, Arbër Ismajli, ka thënë për Gazetën Express se gjatë ditës së sotme nuk është lejuar marrja e mostrave të dyshuara për COVID-19 në këtë komunë.

“Sot nuk është marrë asnjë mostër. Nuk na është lejuar të marrim mostra në Gjilan. Qendra rajonale e shëndetit publik sot nuk e ka marrë asnjë mostër, për shkak të një njoftimi nga IKSHPK-ja dhe MSh’ja”, ka thënë Ismajli.

Ismajli tha se ende nuk kanë dalë rezultatet e mostrave të marra nga data 19 deri më 21 qershor.

“Jemi në pritje të afër 100 mostrave që janë marrë për testim më 19, 20 dhe 21 qershor, rezultatet e tyre nuk kanë dalë ende”, deklaroi Ismajli.

Ndërkohë, Ministria e Shëndetësisë sot ka sqaruar rekomandimin për përditësimin e strategjisë së testimeve.

Përmes një komunikate drejtuar mediave, ky institucion ka bërë me dije se do të testohen të gjitha rastet e hospitalizuara në Klinikën Infektive dhe repartet e dedikuara për pacientët me COVID-19, personeli shëndetësor me shenja dhe simptoma të infeksionit si dhe personeli që ka pasur kontakt të afërt dhe të pambrojtur me të infektuarit.

Testimeve do t’u nënshtrohen edhe të gjitha kontaktet e afërta të personit COVID-19 pozitiv, të cilët kanë shenja dhe simptoma të kësaj sëmundje, personat e moshuar dhe personat me sëmundje kronike dhe të gjitha rastet e dyshuara që kanë shenja klinike në SARS në komunitet apo institucionet e mbyllura (shkolla, spitale, shtëpi të pleqve, burgje).

/mediafokus.info